எவ்வளவு ஓடினாலும்
அடையப் போவது மரணம்தான்

பெயரை தேடுகிறாய்
வசதி தேடுகிறாய்
பிறரிடம் இல்லாததையும்
தேடுகிறாய்
உறவைத் தேடுகிறாய்
எல்லாம் கிடைக்கப் பெற்று
எல்லாமும் கெட்டு
தூக்கம் தேடுகிறாய்

உடன் இருப்போர் இறந்தாலும்
உடன் அதன்பேர் சடலம்தான்

கட்சி இருக்கும்
பதவி இருக்கும்
கூட்டமும் இருக்கும்
கூவலும் இருக்கும்
எப்போதும் போலங்கு
நடிப்பும் இருக்கும்

வந்தவர் எல்லாம்
உன்னை அணைப்பார்கள்
நீ இருந்து
அணைத்தாயே அப்படி

பயம் இருக்காது
அழைப்பு இருக்காது

பாசம் இருக்கும்
நேசம் இருக்கும்
ஆனால் உன்மீது
வைக்க முடியாது

காதல் இருக்கும்
மரியாதை இருக்கும்
ஆனால் உன்னிடம்
காட்ட முடியாது

நீ பணக்காரனாக
இருக்கலாம்
ஆனால்
உன் நெற்றிப் பொட்டில்
வைக்கப் போவது
ஒத்த ரூபா தான் 

உன் பெயர் வாழும்
சிலை வாழும்
உன்னைக் கையில் ஏந்தி
சிலர் வாழ்வார்கள்
நீ வாழ்வாயா

நீ இறந்து
பின் எப்பொழுதும்
வாழப் போவதில்லை...

இப்போதே வாழ்ந்துவிடு
குழந்தைகள் போல்
ஒளிந்து விளையாடு
யார் உன்னை கண்டுபித்தாலும்
எது உனக்கு
நீ தேடாமல் கிடைத்தாலும்
மகிழ்ச்சி கொள்
நேசம் கொள்
பாசம் கொள்
வேசம் கொள்ளாதே

உன்னைத் தேடி வருவோரை
நீயும் தேடிப் போ...
நீ கொடுத்தது எல்லாம்
உனக்கும் கிடைக்கும்
இதுதான் விளையாட்டு

எல்லோர்க்கும் எல்லாமும்
எப்போதும் கிடைக்கும்
மூடி வைக்காதே
உலக அட்சயப் பாத்திரத்தை

எப்பொருள் கிடைத்தாலும்
பிறருக்கும் கொடு
பாரம் குறையும்

உனதை விழுங்கிவிடு
மீதம் தந்துவிடு
கையில் எதுவும்
இல்லாமல் பார்த்துக்கொள்

பொருள் இருப்போரை
மரணமும் தேடி வரும்
அதுவும் வாழ வேண்டுமே...

எடுத்து விளையாடாதே
கொடுத்து விளையாடு

உன்னைத் தேடியும்
மரணம் வரும்
முடிந்தால் மறைந்துகொள்
மாட்டிக்கொண்டாய
மிக்க மகிழ்ச்சி கொள்
இனி உன்னை யாரும்
கண்டுபிடிக்க முடியாது
நீ கடைசியில்
வென்று விட்டாய்

மரணம்
தேடி வரட்டுமே
கொஞ்சம் மறைந்து விளையாடலாம்...