மூடி மூடித் திறக்கிறது
ஒரு மாயக்கதவு

கைகளால்
அது சாத்தியமில்லை
கண்கள் மூடத் திறக்கிறது
கண் திறந்தால்
பூட்டிக்கொள்கிறது

என்னை மட்டும்
அனுமதிக்கிறது
மனதில் யாரும் இருந்தாலும்
வெளியில் தள்ளி விடுகிறது

மௌனமாக இருந்தால்
பேசுகிறது
நான் பேசினால்
மௌனமாக இருக்கிறது

சிரிக்கிறது
அழுகிறது
கண்துடைக்க அருகில் சென்றால்
கானலாகிவிடுகிறது

நீதான் என்று தெரிந்தும்
கண்கள் மூடியே இருக்கிறேன்
உன்னுடன் இருப்பதற்கு

மீண்டும்
என்னைப் பிரிந்து விடாதே
மாயக் கதவுகளை
பூட்டிவிடாதே...

நிரந்தரமாய்
கண் மூடிடவே
நித்தமும் முயல்கிறேன்