சிறு பாதமும்
சின்ன விரல்களும்
உன் குட்டிக் கால்களால்
உலா வர
மண் பூத்துக் குலுங்குகிறது
அதன் வாசம் நுகர்ந்து
இல்லாத சிறகில் கொஞ்சம் பறந்து
காலத்தை நாளும் கொண்டாடு
அதுவே அன்பின் பண்பாடு
அனைவரையும் நேசம் செய்
இயற்கையும் நாமும் வேறல்ல
முத்தம்
வேண்டும் என்று
முத்தம் கொடு
யுத்தம்
வேண்டாம் என்றுகூட
யுத்தம் செய்யாதே
நட்பு
நிழலாய் நில்
எவர் நிழலையும் தேடாதே
நட்பு
தேடி வந்தால்
எதையும் தேடாமல் ஏற்றுக்கொள்
வானம்
ஒரே கூரை
பூமி
ஒன்றே வீடு
இரையை
நாளும் தேடு
உண்ண
ஒன்றாய் கூடு
எல்லோரும்
ஒன்று அல்ல
வேற்றுமையில்தான்
ஒற்றுமை உள்ளது
சுதந்திரம்
உனக்கும் பிறப்புரிமை
எறும்புக்கும்
எவைக்கும் அதேயுரிமை
பகிர்ந்து வாழ
பழகிக் கொள்வாய்
பால் நிலவொளியை
பார்த்துப் பழகு
விஞ்ஞானமும் வேண்டாம்
மெய்ஞானமும் வேண்டாம்
ஞானமே வேண்டாம்
ஞாயிறு போதும்
கருத்துகள் இல்லை:
கருத்துரையிடுக