வாழ்க்கை என்பது வாழைப்பழம்
அதை கீழிருந்தோ மேலிருந்தோ
முழுவதுமாக ருசித்துச் சாப்பிடுங்கள்

கனியும்வரை காத்திருக்க வேண்டும்
அவ்வளவு தான்
கவலைப்படுவதற்கு ஒன்றும் இல்லை

அடுத்தவரிடம் இருந்து பிடுங்காதீர்கள்
உபரி இருந்தால் கொடுத்துவிடுங்கள்
அயல்நாட்டிடம் வாங்காதீர்கள்
நம் நாட்டிலேயே விளையும்

வயிறு விரும்பும்வரை உண்ணுங்கள்
நாக்கை ரசியுங்கள் ருசியுங்கள்
சொல் பேச்சு கேட்கவேண்டாம்

உரிப்பதற்கு கற்றுக் கொடுப்பவர்களிடம்
எச்சரிக்கையாய் இருங்கள்
அன்னிய உடைகளில் மொழிகளில்
மாறுவேடத்தில் வரலாம் அவர்கள்

உள்ளூர் காரர்கள் கூட
உயர்ந்த ஆடையுடன் அலையலாம்
அடையாளம் கண்டு கொண்டால்
ஐந்தாண்டுகள் காத்திருக்க வேண்டாம்