நினைவுகள் உதிர்ந்த மனமும்
இலைகள் இல்லாத மரமும்
நிழல் இன்றித் தவிக்கின்றது
இலைகள் வேண்டும்
அசைந்தாட வேண்டும்
மலர்கள் வேண்டும்
மனம் வீச வேண்டும்
இன்னிசை வேண்டும்
குயில் பாட வேண்டும்
பரவசம் வேண்டும்
பட்டாம்பூச்சிகள் வேண்டும்
வெயிலில்
ஒரு காலில்
தவம் கிடக்கின்றது
பனித் துளியில்
கடை இரவில்
உள்ளூர துளிர்க்கின்றது...
எந்தப் புள்ளியில் தொடங்கும்
எந்தப் புள்ளியில் முடியும்
உயிர் வரையும் ஓவியம்
எது மாதிரியும் இல்லாமல்
இது மாதிரியும் ஏதும் வாராமல்
புது மாதிரி ஓவியம்
விதை ஒன்று முளைக்கும்
கொடி சுவர் பற்றி வளரும்
மலரும் உதிரும் ஓவியம்
பட்டாம்பூச்சி பறந்த பாதை ஓவியம்
காதல் போதையில் கடந்த காலம் ஓவியம்
புரிந்தும் புரியாத ஞானம் ஓவியம்
குழந்தை வரையும் ஓவியம்
குழந்தை விரலை வரையும் ஓவியம்
கடவுள் வரையும் ஓவியம்
குழந்தையைப் போல் அடம்பிடிக்கிறேன்
பிடித்தால் என்ன?
பிடித்து இருக்கிறது
உன் மெல்லிடையில் இருந்து
தாவிக் குதிக்கப்
பிடித்து இருக்கிறது
நீ முந்தானை எடுத்து
சுற்றி வளைத்து
மெல்லிடை மறைக்கிறாய்
இந்தக் குழந்தையை முறைக்கிறாய்
தாவி ஏற
குழந்தையைப் போல் அடம்பிடிக்கிறேன்...
பிடித்து இருக்கிறது
வேறென்ன செய்வேன்
உள்ளங்கை பத்திக்கும்
ஆனாலும் தித்திக்கும்
சிக்கிமுக்கி கல்லுக்கும்
முன்பானது தேகக் கூடல்
உன் விழி வித்தைக்கும்
என் வழி மறக்கும்
தென்னம்பனை கள்ளுக்கும்
முன்பானது பார்வைக் கூடல்
உன் பாதம் நடக்கும்
என் இதயம் நடிக்கும்
நீ தாண்டி போனதும் தான்
அது மெய்யாகத் துடிக்கும்
வேர் ஈர்க்கும் நீரைப் போல
எனை ஏதோ இழுக்கும்
ஆகாயம் மலரைப் போல
மனதுக்குள் பூக்கும்
உன் இதழ்கள் நியாபகம் வந்து
தேன் மேலும் இனிக்கும்
தேனீக்கள் கனவினில் வந்து
யாரென்று தினம் கேட்கும்
கடல் அலையென நாவிற்கும்
ஓயாமல் ஓயாமல் தயக்கம்
ஒரு சொல்லை மீண்டும் மீண்டும்
சொல்லாமலே கொண்டு செல்லும்...
கண்ணாடியில் நீர்த் துளிகள் பூக்கும்
நீர்த் துளிகளில் நிகழ்வுகள் பூக்கும்
நிகழ்வுகளில் எண்ணங்கள் பூக்கும்
எண்ணங்களில் நினைவுகள் பூக்கும்
நினைவுகளில் நீ பூக்கும்
நீ பூக்கும் தருணங்களில்
நான் பூக்கும்
கண்ணாடியில் நீர்த் துளிகள் உதிரும்
நீ உதிரும்
நீ உதிரும் தருணங்களில்
நான் உதிரும்
நான் பூக்கும்
நான் உதிரும்
நானல்ல நீதான்
நீ பூக்கும்
நீ உதிரும்
நிகழ்வுகள் மட்டும்தான்
நீர் வற்றிய நதியில்
காணும் கானல் நீர்
நதியின் நினைவுகளா
ரதியின் நினைவுகளா
கடல் சேர்ந்த நதியின்
ஓயாத அழுகை
உப்பு
உடல் சேரும் உப்பில்
பாய்ந்தோடும்
உன் உணர்வுகள்
அலையலையாய்...
மாயக் கண்ணீர்த் துளிகள்
வழிந்து வரும்
துளித்துளியாய்...
நீர் வற்றிய கண்ணில்
காணும் கானல் நீர்
நதியின் நினைவுகளா
ரதியின் நினைவுகளா
குழந்தையாக இரு
நாழிகை தோறும் பிற
வானம் எங்கும் பற...
உடல் வீணையை
உயிர் மீட்டும்
இசையில் நனை...
புன்னகை வீசு
இன்மொழி பேசு
எல்லா உயிர்களையும் நேசி...
அன்புத் தம்பிக்கு
நாழிகை தோறும்
இனிய பிறந்தநாள் வாழ்த்துகள்
கண் முன் தெரியும் அனைத்தையும்
வியந்து பார்க்கும் குழந்தை நீ
யானையை பார்க்கும் எங்களைப் போல்
எறும்பை துரும்பை காண்பவன் நீ
வடிவம் தாண்டி பார்ப்பவன் நீ
வடிவில் அமரா வானம் நீ
ஒற்றைச் சொல்லில் நண்பன் நீ
நீடூழி வாழ்க நண்பா
இனிய பிறந்தநாள் வாழ்த்துகள்
