புதுமைப்பித்தன்

சித்தம் நன்றாக கலங்கி விட்டது
பார்ப்பவை எல்லாமே அழகாகத் தெரிகிறது
நல்லது கெட்டது இல்லாத ஒரு உலகம்
அவன் கண்முன் விரிகிறது...

எச்சரிக்கையாக இருங்கள்
அவன் எது சொன்னாலும் பலிக்கும்
ஊரே கூடி சிரிக்கும் என்றாலும்
எல்லாமே அவன் இஷ்டப்படி தான் நடக்கும்...

நீ ஆட்டோகிராப் கேட்டு நிற்கும்
நட்சத்திரம் போலில்லை
போலியும் இல்லை
இவன் விசித்திரம்
எந்த மகாக் கலைஞனும்
வரைய இயலாத ஓவியம்

நம் எல்லைக்குள்
நம்மை இருக்கச் செய்யும்
ஆண்டவன்... எழுத்தை ஆண்டவன்

திரு நெல்  வேலி
சென்னை உப்பு வேலி
இடையில் வாழ்ந்தாலும்
பிரபஞ்சம் எங்கும் பறந்து திரிந்த
பறவைகள் இரண்டு
ஒன்று கவிச் சித்தன்
எங்கள் பா ரதி
இவன் கதைச் சித்தன்
எங்கள் புதுமைப்பித்தன்...

மயானத்திலிருந்து வெளியே வந்ததும்
மீண்டும் நீ யாரோ
நான் யாரோ...

மீண்டும் நீ
மரணிக்கப் போவதுமில்லை
நாம் சந்திக்கப் போவதுமில்லை

மறந்து வாழ்வது
பழகிவிட்ட ஒன்றுதான்
மொத்தமாக நீ மறந்தாய்
வழக்கம்போல நான் மறந்தேன்
     
காலை கண்ணாடியில்
மாலை கண் ஆடியில்
எனை நானே புதைப்பேன்
நடுவில் எண்ணிலாமல் மறப்பேன்

மொத்தமாக ஒருநாள் மறப்பேன்
மயானத்திற்கு உள்ளே வந்ததும்
மீண்டும் நீ அறிவாயோ
நான் அறிவேனோ...

முழுவதுமாக
அழுது தீர்த்துவிட வேண்டும்
வெண் மேகமாக வேண்டும்

இந்த வாழ்வை
தூக்கிச் சுமந்தது போதும்
காற்றிடம் தந்துவிட வேண்டும்

காற்றின் போக்கு
கடவுள் போக்கு
போகிற போக்கில் போகலாமே...

நிறைய பேர் இருந்தோம்
ஏதும் இல்லாத போது
நண்பர்கள் நாங்கள்
நிறைய பேர் இருந்தோம்
ஏதும் இல்லாத போது

ஏதும் இல்லாமல்
போகும் ஒர் நாளில்
மீண்டும் எல்லோரும்
வருவார்கள் மாலையோடு

மீண்டும் எல்லோரும்
வருவார்கள் மாலையோடு...
ஊர் பார்க்கச் சிலர்
எனைப் பார்க்கச் சிலர்

ஏதும் இல்லாமல்
போகும் இடம் தன்னில்
நிறைய பேர் கிடைப்பார்கள்
அன்று போல்
கண்ணீரைத் துடைப்பார்கள்

ஏதும் இல்லாமல்
கிடைத்த நண்பர்கள் போலில்லை
வேறெந்த நண்பர்களும்...

இரவில் இறந்திட வேண்டும்
சில நிமிடங்கள் முன்பேனும்
அது தெரிந்திட வேண்டும்
வெள்ளை மெழுகுவர்த்தி வேண்டும்
அதைப் பற்ற வைக்க வேண்டும்
தனிமையில் தனிமையில்
அதைப் பார்த்திருக்க வேண்டும்
மெல்ல மெல்ல நெருங்கும்
மிக மெல்லிய ஒளியில்
உயிர் கலந்திட வேண்டும்
மரணம் அணைக்கும் பொழுதும்
வாழ்ந்திட வேண்டும்
வாழ்ந்திட வேண்டும்
வாழ்ந்திட வேண்டும்...

தடைகளைக் கூறி
தளும்பி அழும் எறும்புகளை
இதுவரைக் கண்டதில்லை...

மதிலோ மலையோ
குளிரோ வெயிலோ
நகர்ந்து செல்லும் வாழ்க்கை

தடைகளைக் கூறி
தளும்பி அழும் எறும்புகளை
இதுவரைக் கண்டதில்லை... 

இந்த உலகத்தோடு
சண்டையிட்டுக் கொண்டே இருந்தால்
எப்போதுதான் வாழ்வது...

மூன்றாம் நாளில் மட்டுமல்ல
முதல் நாள் முதல்
இதுநாள் வரையிலும்
ஒவ்வொரு நாளும்
உயிர்த்தெழுகிறவர்
ஏழைகள்...

சுமக்கும் சிலுவையிலேயே
தூங்கி எழுகிற வாழ்க்கை
தூக்கி அலைகிற பிழைப்பு

எல்லோரும் சமமாய்
வாழ்ந்திடும் கனவிற்கு
எதிரானவர்களுக்கு ஏது பாவமன்னிப்பு...

சாலை கடக்கும்
பட்டாம்பூச்சிக்கு
ஏனோ படபடப்பு...

வான் கடல்
மேக அலைகள்
கால்கள் நனைக்க முடியாமல்
கண்கள் நனைக்கிறேன்

அன்று அருகில் இருந்தவள்
இன்று துளியில் இருக்கிறாள்...

எத்தனைத் துளிகள்
எண்ணி விட்டேன்
அத்தனையும்
உன்னைத் தொட்ட
மழைத் துளிகள்

ஒரு துளி மட்டும்
எண்ணிக்கைப் பிழை
அதை நீக்கி வருவதுவே
சரியான விடை

எண்ணிக் கை
கடைசி துளியாய் மாறி
உன்னைத் தொட்ட
கனவின் கை...

உன்
கலைந்து ஆடும் கூந்தல் போல
நான் கண்டதில்லை நடனம்...

உடைந்த கட்டிடம்
உனைப் போல் தெரிகிறதென்றால்
என்ன அர்த்தம்?

ஒரு பாலைவனம்
என்னைத் தொடர்ந்து வருகிறதென்றால்
என்ன அர்த்தம்?

விடைகள் இருந்தும்
கேள்விகள் விடாமல் எழுகிறதென்றால்
என்ன அர்த்தம்?...

ஆறாம் அறிவு வேண்டாம்
இறைவா
சிறகுகள் வேண்டும்
தருவாயா...

எனக்கு ஆடையும்
நிலத்து வேலியும்
யானைக் காலின் சங்கிலியா...

ஆடை தாண்டி
வேலி தாண்டி
வானம் ஏறிப் போகவேண்டும்...

ஆறாம் அறிவு வேண்டாம்
இறைவா
சிறகுகள் வேண்டும்
தருவாயா...

இசைஞானி

மூடா...
தீ மூளும்
மண் மூடும்
இடையில் நீ மூடும்
ஏதும் நிலைக்காது
போடா...
எப்பவுமே ராஜா
எங்கள் இசை ராஜா

காதலியோ காதலனோ
கள்ளக் காதலியோ
கள்ளக் காதலனோ
ஒரு நல்லக் காதல்
எல்லோர் வாழ்விலும் பூக்க வேண்டும்

பிடிக்காத உறவுகளிடம்
சொல்லி விடுங்கள்
அவர்களுக்கு பிடித்த உறவு
எங்கேனும் பூத்திருக்கும்
எங்கேனும் பூக்கும்
தன்னுள்ளேனும் பூக்கும்
பிடிக்காத உறவுகளிடம்
சொல்லி விடுங்கள்...

இன்பத்தைத் தேடுங்கள்
இன்பத்தையே கொடுங்கள்
துன்பம் தேடி
ஏன் துன்பத்தையே தருகிறீர்கள்? 

அழகான கண்களுக்கு
எல்லாமே அழகாகத் தான் தெரியும்
நீயென்னை அழகில்லை என்று சொன்னாலும்
நீ அழகாகவே இருக்கிறாய்...

நாளும் பொழுதும்
விளையாட்டு
சேர்ந்து ஆடி
உயிர்க் கூட்டு...

கண்ணாமூச்சி வாழ்க்கை
உடலுக்குள் ஒளிந்து
உலகத்தைப் பார்ப்பது
உள்ளத்தைப் பார்ப்பது
எவருக்கும் தெரியாது
எல்லோருக்கும் உண்டு
உள்ளும் வெளியும்
பரம ரகசியம்...

போகிற போக்கில்
போவது வாழ்க்கை
மற்றதெல்லாமும் பிழைப்பு...

எப்பேர்ப்பட்ட இருளும் விடியும்தானே
வலியும் வறுமையும் மாறாதா என்ன?

விடியும்போது எழுந்து
இருளும்போது தூங்கு
எல்லாமே சுகமாகும்...
என்று பாடிச் செல்கிறது
ஒரு கானப்பறவை

உனைக் கண்டு
நான் மலர்ந்த
நிமிடங்களை மறவேன்...
மறக்கின்ற நாழிகையில்
கண்மூடி உதிர்வேன்...

கவிதை என்பது
முத்தம் போல

அது
இப்படி இருக்க வேண்டும்
அப்படி இருக்க வேண்டும்
என்று
எப்படி வேண்டுமானாலும்
பேசிக் கொள்ளுங்கள்

கவிதை என்பது
முத்தம் போல

தந்துவிட்டதன் பின்
விளக்கம் எல்லாம் வேண்டாம்
சிறு அமைதி வேண்டும்
அதிலிருந்து
பேரமைதிக்குப் போக...

கவிதை என்பது
யுத்தம் போல

சார்ந்தவரைத் தவிர
பிறர் யாவர்க்கும்
அர்த்தமில்லாமல் தோன்றும்

கவிதை என்பது
யுத்தம் போல

காயம்பட்ட இதயம்
ஆயுதம் இன்றி
இப்படியும்
தனித்துப் போராடும்...

சில நேரம் முத்தம்
சில நேரம் யுத்தம்
இன்னும் சிலசில என
சில நேரங்களில்
சில கவிதைகள்

ஒரு போல
ஒரு பொழுதும்
இருப்பதில்லை

ஒரு வரையறைக்குள்
சிறை படுத்தல்
அர்த்தமில்லை

என்றும் மகிழ்
எதிலும் மகிழ்
சிரித்து மகிழ்
அதையே கொடுத்து மகிழ்
இனிய பிறந்தநாள் வாழ்த்துகள்
இனியன்

உன் விழியின் ஓரத்தில்
சிறு இடம் கொடு
இந்த உலகின் ஓரத்தில்
நான் வாழ்ந்து கொள்கிறேன்...

சிலரின் சிகை அசைவு
காற்றில் அசைந்து அசைந்து
நிஜத்தைத் திருத்தி
உன்னை வரைகிறது...

மேகங்களை
வரைந்து முடிப்பதற்குள்
வேறு மாதிரி வரைந்து விடுகிறாள்
இறைவி
வாழ்வையும் கூட...

அவளே ஓவியள்
அவளே
வரைந்த மேகமும்
அவளே
பொழியும் மழையும்
அவளே
நனையும் நானும்...

தேர்தல் நிலவரம்

 (சிறுகதை - 2) 

"என்னப்பா யாரு ஜெயிச்சாங்க?" (என்று அந்த அம்மா) 

பிஜேபி (என்று நான் சொல்ல) 

"திமுக வரலயா..." 

அவங்க 40க்கு 40 ஜெயிச்சிட்டாங்க

"ஓ 80தா..."

இல்ல மொத்தம் 40, அந்த 40லயும் ஜெயிச்சிட்டாங்க

"ஓ... ஸ்டாலின் வந்துட்டாருல..."

சிரித்துக்கொண்டே ஆமா ஆமா வந்துட்டாரு 

(அவளுக்கு எல்லாவற்றையும் புரிய வைக்க வேண்டும் என்ற நோக்குடன், தானாக முன்வந்து) 

தமிழ்நாட்டுல ஸ்டாலின் 40ம் ஜெயிச்சி வந்துட்டாரு. இந்தியாவுல மொத்தம் 543, அதுல மோடி 290/ ராகுல் காந்தி 235/ மற்றவை 18. மோடி தான் அதிகம். 

"அப்ப ஸ்டாலினோட வருமே அந்த புள்ள ஜெயிச்சிடுச்சா?" 

ராகுல் காந்தி தானே, இல்ல மோடி தான். 

"ஏன் ஸ்டாலின் தான் ஜெயிச்சிடுச்சுல"

ஸ்டாலின் தமிழ்நாட்டுல தான். இந்தியாவுல மோடி தான். 

"பாவம் அந்த புள்ள...(ராகுல்காந்தி)" 

ஆனாலும் காங்கிரஸ் கொஞ்சம் தான் கம்மி. நாளைக்கு தான் சரியா தெரிய வரும். 

யாரு உண்மையில் ஜெயிக்கப் போறாங்கன்னு. 

"அப்ப மோடி வர மாட்டாரா?" 

நாளைக்கு சரியா தெரிஞ்சிடும் அம்மா. 

"பாவம் அவர்தான் கொரானா அப்ப 3000 போட்டாரு எனக்கும், என் மருமகளுக்கும்..." 

ஓ அப்படியா... எப்ப? முதல் கொரானலயா? 2வது கொரானலயா? 

"தெரியல... கொரானா அப்ப போட்டாரு" 

சொல்லிட்டு வெள்ளந்தியா போறாங்க அந்த அம்மா... 

எத்தனை முறை கேஸ் வீட்டுக்கு வரும் போதெல்லாம் இந்த அம்மா மோடிய சபிச்சி இருக்கும். ஆனா ஏன் இப்ப அவருக்காக ஜெபிக்குது... அவங்களுக்கு அது புரியல, எனக்கு இது புரியல... இந்த ரெண்டுக்கும் நடுவுல இந்த அரசியல்வாதிங்க பண்றது அவங்களுக்கே புரிஞ்சி தான் செய்றாங்களான்னும் தெரில... 

காந்தியோட அந்த மெல்லிய புன்னகை மனதில் வந்து போகிறது. ஒருவகையில் மோடி சொன்னது கூட சரி போலத்தான் தோனுது. (காந்தி படம் வந்த பிறகு மட்டும் என்னத்த காந்திய பத்தி தெரிஞ்சுகிட்டோம்) 

மழை வந்தால்
ஆட்டத்தை ஆரம்பிப்பவர்கள்
நாங்கள்

இந்த அனுபவத்திற்கு
விலையில்லை
அந்தஸ்து இல்லை

பவுண்டரிக்கு லட்சம் இல்லை
எந்த லட்சியமும் இல்லை
தோற்றாலும் வென்றாலும்
நாங்கள் எதிரிகள் ஆவதில்லை

உலகமே கோப்பை
எல்லா கவலைகளுக்கும்
குட் பை...

தென்னை மரத்தின் கனவில்
யார் வந்தது?
என்னைப் போல் அதுவும்
பிறகு தூங்கவேயில்லை...

இசை ராஜா
இசையில் என்றும்
இளைய ராஜா

இதயங்களுக்கு
பின்னணி இசைத்த
இதய ராஜா

பட்டாம்பூச்சியாக, பறவையாக
மாற்றிடும்
மந்திர ராஜா

நமது இசைஞானி
இளையராஜாவிற்கு
இனிய பிறந்தநாள் வாழ்த்துகள்

இரண்டாயிரம் சிலைகள் அல்ல
இரண்டாயிரம் பிழைகள்
ஆயிரம் பெரியார் வந்தாலும்
உங்களத் திருத்த முடியாதுடா...

பத்து நாள் பட்டினிப் போட்டு
குளிரூட்டி இல்லாமல்
குடிசையில் தூங்கச் செய்து
மினரல் வாட்டருக்குப் பதிலாக
குழாய் தண்ணீர் குடிக்க வைத்து
பதினோராம் நாள்
ரேஷன் அரிசி கஞ்சி கொடுத்தால்
ஒருவேளை திருத்தலாம்...

கள்ளப் பணத்தை எல்லாம்
கல்விக்குத் தாருங்கள்
எல்லோருக்கும் சமமான
கல்வி தீபம் ஏற்றுங்கள்
வளர்ச்சித் திட்டங்களைத் தீட்டுங்கள்
மக்கள் வாழ்க்கைத்தரம் கூட்டுங்கள்
நேர்மையாக இருக்க முயற்சி செய்யுங்கள்
ஏழையின் சிரிப்பில் இறைவனைக் காணுங்கள்
உண்மையான சிரிப்பை உங்களில் காண்பீர்கள்
சிலையின்றி மனதில் சித்திரம் வரையுங்கள்
பயந்து வாழ்வது போதும் தலைவர்களே
சிரித்து வாழுங்கள்
பிறர் சிரிக்க வாழுங்கள்...