ஒளிந்து பார்ப்பது
ஒரு விளையாட்டு
உனக்குத் தெரியுமா?
உன்னுடன் நான் விளையாடியது...

உயிரை விதைத்து விதைத்து
உயிர்கள் துளிர்க்கும்
உலகம்

பயத்தை விதைத்து விதைத்து
தைரியம் துளிர்க்கும்
இதயம்

எல்லோர்க்கும் நிலவு
எனக்கு நீ
உனக்கு நான்

கையில் காற்றாடியோடு
காற்றோடு பேசிக்கொண்டிருக்கையில்
வானம் ஒட்டுக் கேட்கிறது...

உயிரை வளர்ப்பதால் இல்லை
கண்ணீரைத் துடைப்பதால்
காற்றைப் பிடிக்கும்...

குழந்தை
குரங்கெனச் சொல்லும்
வாயில் காற்றை நிரப்பி
குரங்காக சேட்டைகள் செய்திடுவேன்...

குழந்தை
நாயெனச் சொல்லும்
சட்டென வவ்வென்று குரைத்திடுவேன்

நட்பே
நீ முட்டாள் என்றெனை நினைக்கையில்
நான் முட்டாளாய் மாறியதை
நீ அறிவாயா...

நட்பே
நீ பைத்தியம்  என்றெனை அழைக்கையில்
நான் பைத்தியம் ஆனதை
நீ ரசித்தாயா...

எது எப்படியோ
அது அப்படியே எனக்குப்
பிடித்துப்போனது
அப்படித்தான் அப்படித்தான்
நான் இப்படி மாறிப்போனது...

எல்லோரும் பயப்படும் போது
சிரிக்கத் தோன்றும்
எல்லோரும் சிரிக்கும் போது
பயப்படத் தோன்றும்
எல்லோரும் கண்மூடும் போது
விழிக்கத் தோன்றும்
எல்லோரும் பேசும் போது
மௌனிக்கத் தோன்றும்...
எல்லோரும் பயணிக்கும் பாதைக்கு
எதிரில் நடந்திடும் ஒருவன்
என்னுள்ளும் இருக்கிறான்
அவன் இஷ்டப்படி நடக்கிறான்...

தாகம் ஒன்றுதான்
தண்ணீரின் அளவுதான்
வெவ்வேறு...

துக்கம் ஒன்றுதான்
கண்ணீரின் அளவுதான்
வெவ்வேறு...

வண்ணம் இல்லாத
வண்ணத்துப்பூச்சிகள் இரண்டு
கனவில்
வானவில்லை வரைகிறது...

ஏழு நிறமா?
ஏழு ஜென்மமா?
நினைவில்
ஏதேதோ விரிகிறது... 

யாராக மாறிக் கொண்டிருக்கிறோம்
நாம் நாமாகவா?
வேறாகவா?

சில வருடங்கள் கடந்து
வேறாக
பின்
சில மாதங்கள் கடந்து
வேறாக
பின்
வாரங்கள் கடந்து
வேறாக
பின்
ஒருநாளைப்போல்
மறுநாளில் இல்லாமல்
வேறாக வேறாக...
நான்
நாழிகையில் நாலாக
மாறிக்கொண்டே சுழல்கிறேன்
பூமி
நாழிகையில் நூறாக
மாறிக்கொண்டே சுழல்கிறது

விதை வேராக
வேர்
வேறிடம் போகும் பயணத்தில்
வேர்
இலையாகப் பூவாகப்
பூத்துக் கனிந்து
வீழும் விதையாக
வேரறுந்து இடையில்
காற்றின் உறவாக
மீண்டும்
மண் தொட்டு
வேர் விட்டு
வேர்
வேறிடம் போகும் பயணத்தில்
ஓரிடத்தில் சுழல்கிறது
இயற்கை இப்படித்தான்
புதிதாய் புதிதாய்
நாளும் சமைக்கிறது...

நாமும் கூட...

கொடுக்கும் அளவிற்கு
கிடைக்கும் அன்பு
நல்ல வியாபாரம்...

விவசாயிகளுக்கு லாபம்
முதலாளிகளுக்கு லாபம்
தொழிலாளிகளுக்கு லாபம்
கடவுள்களுக்கு லாபம்

லாபம் சேர்க்க
படிப்புகள்
லாபம் சேர்க்க
ஆய்வுகள்
லாபம் சேர்க்க
குழுமங்கள்
லாபம் சேர்க்க
போர்கள்

அன்பு செய்த
காலம் மாறி
லாபம் செய்யும்
காலம் ஆகிப்போனது
அன்பு காலமாகிப்போனது...

உயிர் மூச்சில்
எது லாபம்?
எது நட்டம்?

ஒருவர் லாபம்
ஒருவர் நட்டம்
சிறு தவறு

ஒருவர் லாபம்
பலர் நட்டம்
பெரிய தவறு

அரசியல் சட்ட திட்டங்கள்
எல்லோர்க்கும் சமன்
இல்லையேல் எமன்

உலகம் முழுதும்
உயிர்கள் அனைத்தும்
பகிர்ந்து வாழும் மூச்சு

இதில்
உயர்வு தாழ்வு
என்ன பேச்சு...

பகிர்ந்து வாழும்
தேனீக்கள்
பறித்து வாழும்
மனிதர்கள்

கன்று குடிக்கும் பாலை
கவர்ந்து குடிக்கும் மக்களை
நியதி மீறி
நீதி பேசும் ஆட்களை...

எண்ணி விட முடியாத
நட்சத்திரங்களை
விலை பேச
லாபம் எண்ணி எண்ணி
சேர்க்கும் நபர்களை...

இயற்கையைச் சுரண்டி
செயற்கையைச் செய்யும்
நம்மை...

லாபம்
ஓர் நாளில்
நட்டமாக்கும்...

சிரித்துக்கொண்டே இருப்பவர்களுக்கு
சிறு மூளையாம்
பெரு மூளைப் பெருந்துயரம் தான்...

கடல்
உருமாறி
தாகம் தீரும்

உடல்
உருமாறி
தாபம் தீரும்

அந்தப் பாடலைக் கேட்கும் போதெல்லாம்
அந்த நாட்களில் சென்று உலவி வர
உன் இல்லாத கை என்னை
ஏதும் சொல்லாமல் பிடித்திழுத்து
நானிங்கு  இல்லாமல் செய்கிறது...

தேடி வந்து
தேட வைத்து
திரும்பிப் போன
அலைக்குத் தெரியுமா?
நான் கரையாக மாறியது...

மூங்கில் இசையில்
மௌனமும் உறங்கும்...

மூங்கில் பாடையில்
மீளா உறக்கம்...
பஞ்சடைத்தக் காதுகளில்
மூங்கில் என்ன இசைக்கும்?

மேடையேறிப் பாடுவது போலில்லை
பாடையேறிக் கேட்கும் பாடல்
பரம ரகசியம்...

வெற்றி துரைசாமி

இயற்கை ஆர்வளன்
இயற்கையிடம்
சரணாகதி அடைந்தான்

ஏழை எளியோர் வீட்டில்
கல்வி விளக்கேற்றினான்
பேரொளிக்குப்  பேராசை கொண்டான்
தானே பெரும் ஜோதியானான்...

ஏனைய உயிர்களிடம்
உயிரை வைத்தவன்
உடல்தான் துறந்தான்
அந்த ஜீவன்களில்
என்றும் உயிர் வாழ்வான்...

மழைப் பாடலை
கோடையில் எழுதும்
வறுமை உனக்குப் புரியாது...

குளிரில்
நெருப்பை வரைவேன்
எவர் கண்ணுக்கும் தெரியாது...

நண்பனோடு இருந்தவரை
உலகம் எங்களுடையதாய் இருந்தது
எங்கும் போய் வருவோம்
எல்லோரையும் வாழ விடுவோம்
எங்கள் சுதந்திரத்தை
எல்லோர்க்கும் பகிர்ந்தளித்தோம்
எங்கள் உலகமாக இருந்தவரை
எல்லாம் நன்றாகவே இருந்தது...

ஒர்நாளில்
வேலை கிடைத்துவிட்டதாக
பணம் கிடைத்துவிட்டதாக
நிலம் கிடைத்துவிட்டதாக
வீடு கிடைத்துவிட்டதாக
வாழ்க்கை கிடைத்துவிட்டதாக
வாகனத்தில் இருந்தவாறே சொன்னான்
எங்கள் உலகம் அங்கேயே
தொலைந்துவிட்டதாகத் தோன்றியது...

உலகை விட்டுவிட்டு
உடைமைகளை வாங்குகிற வரிசையில்
எல்லோரும் நின்று கொண்டிருக்கிறார்கள்
எனக்கது பிடிக்கவில்லை
உலகை தமதென்று சொல்ல
நண்பன் உடனில்லை
எங்கும் போய்வரப் பிடிக்கவில்லை
எனை நானே வாழ விடுவதுமில்லை...

இப்போது வேறு உலகில் இருக்கிறேன்
அடிக்கடி பைத்தியம் கிடைக்கிறது
அதுவே மிகவும் பிடிக்கிறது
அதை எல்லோருக்கும் பகிர்ந்தளிக்கிறேன்
பிடிக்கவில்லை என்றாலும்
சிறிதேனும் எடுத்துச் செல்லுங்கள்
எப்போதேனும் கண்டிப்பாகப் பிடிக்கும்
இதயம் வேறுமாதிரித் துடிக்கும்
வானத்திற்குக் கூட்டிச் செல்லும்
வானத்தில் வரிசை இல்லை
நண்பனோடு இணையலாம்
எங்கும் போய் வரலாம்
மீண்டும் உலகம் நம்முடையதாகும்...

இந்த நொடி தான்
கடைசி வாய்ப்பு எனில்
அதுவே வெற்றி...

Direction is more important
If you act
Otherwise it's doesn't matter...

இலையில்லா கிளைகளோடு
மரங்கள்
நகர்ந்து செல்கின்றன...

கிளையாவும் இலைகளோடு
மான்கள்
துள்ளாமல் நிற்கின்றன...

தரையில் விழுந்த பூவிற்கு
விரல்கள் காம்பாகும் போது
ஒரு மரமாய் உணர்ந்தேன்...

வந்தமர்ந்து சென்றது
ஒரு குருவி
நிழலில் சில அணில்கள்...

பேசாமல் இருந்தால்
வெட்டப்படுவாய்
மரத்தைப் போல...

காற்றைப் போல
மாற விரும்புகிறவர்கள்
கரையத்தான் வேண்டும்...

தொடர்ந்து மழைத்துளிகள்
விடாமல் பேசிக் கொண்டிருக்கின்றன
விட்டுப்போன உன்னைப் போலவே...

கடைசி வார்த்தை கேட்கவில்லை
சொல்லிப் போனாயோ?
சொல்லாமல் போனாயோ?

இரண்டு விதமாய் விடைகள்
மாறி மாறிப் பூத்து உதிர்கிறது
இதயத்தின்  உரமாகிறது...