நாய்கள் வளர்க்கிறார்
கண்காணிப்பு கேமரா அமைக்கிறார்
கடவுளுக்கும் தனியறை கொடுக்கிறார்...

பணத்தைக் குவிக்கிறார்
பயத்தைப் பெருக்குகிறார்
பாடை ஏறும் வரை தவியாய் தவிக்கிறார்...

பகட்டாய் நடிக்கிறார்
பதவியை அடகாய்க் கேட்கிறார்
முந்திரியாய் வளைந்த மந்திரியை
பார்த்துப் பார்த்துச் சிரிக்கிறார்...

எத்தனை முத்தமிட்டும் எழவில்லை
உயிரை உறிஞ்சி கொண்டுபோனது
மரண முத்தம்...

ஒவ்வொன்றாய் விலகும் போது
ஒன்று அருகில் வரும்
தான் விலகிய நாழிகை நினைவில் வரும்...

எனக்குள் இருக்கும் வானிலும் ஏராளம்
யாருக்குள் இருக்கிறதோ இந்த வெளிவானம்
அதிலும் ஏராளம்

இருந்தும் இல்லாதது வானம்
இருக்கும் நாம் இறக்கக்கூடும்
இறக்க கூடும்  முழு வானம்...

ஒளி
நிழல் வரைகிறது
இருள்
நிஜம் வரைகிறது

ஒளியில் மறையும் நிஜம்
இருளில் மறையும் நிழல்
இரண்டும் ஒன்றினைந்து
கனவை வரைகிறது...

பறவை ஆக
பக்கத்தில் நீ வேண்டும்
இடைவெளி குறையக் குறைய
வானில் உயர உயர
பறந்து போகிறேன்...

நூல் இழைகள்
பின்னிப் பின்னி
ஆடை

மூங்கில் இழைகள்
பின்னிப் பின்னி
கூடை

மணல் துகள்கள்
பின்னிப் பின்னி
பாலை

மலர்கள் வாசம்
பின்னிப் பின்னி
சோலை

நீர்த் துளிகள்
பின்னிப் பின்னி
நதி

எண்ண அலைகள்
பின்னிப் பின்னி
விதி

தன்னை மறைத்து
தன்னை மறைத்து
தன்னை மறைக்கிறது
இந்த வாழ்க்கை...

உயிர் பறித்து செல்கிறாள் ஒருத்தி
உயிர் சுமந்து வருகிறாள் ஒருத்தி
ஒருத்திக்கும் ஒருத்திக்கும் இடையில் இன்னொருத்தி...

நீ
காதில் விழுந்தமாதிரி
கண்ணில் விழுந்தமாதிரி
இதயத்தில் விழுந்தமாதிரி
விழுந்து எழுந்து போகிறது அலைகள்
கூப்பிடத் தோன்றவில்லை
ஏமாற விருப்பமில்லை
கால்கள் நனைத்து
கண்கள் நனைத்து
நிற்பதைத் தவிர
வேறொன்றும் தோன்றவில்லை...

ஈர்க்குச்சிகளும் ஈரமும்
அதிகாலையில் பேசும்
ஓம் என்னும் ஒலியைப் போல
மனதில் மந்திரம் பாயும்...

வெளியில் போகும்போது
காற்றில் சிலுவை வரைவாள்

உள்ளம் நோகும்போது
நெற்றியில் திருநீறு பூசுவாள்

உடல் கெடும்போது
மசூதிப் பெரியவரிடம் சொல்லி ஓதுவாள்

நான் நலமுற வளமுற
அவளுக்கு தெரிந்த
அத்தனையும் செய்து பார்க்கிறாள்

நான் எதுவும் தெரியாமல்
செய்வதறியாமல்
வெறுமெனவே பார்க்கிறேன்

நான்
வெறுமெனவே பார்ப்பதில்
வெறுமெனவே சிரிப்பதில்
அம்மாவுக்கு மட்டும்தான்
அத்தனை சந்தோஷம்...

நிலவை நித்தமும் காட்டி
ஒரு கை ஊட்டிக் கொண்டிருக்கும்
உணவை நினைவை...

ஒரு கை இல்லை
ஒரு நிலவு இல்லை
கோடானுகோடி கை
கோடானுகோடி நிலவு
கோடானு கோடியாய்
நானும் கூட...

இருளில்
எரிந்து அணையும் தீக்குச்சி
என்னுள்ளே ஏதேதோ பற்றவைக்கும்...

வலை
தூண்டில்
எல்லாம் விடப் பெரியது
கடல்

மரித்த மீனுக்கு
தெரிந்திருக்கலாம்
கடல்
வாழ்க்கையா?
இல்லை அதுவும்
வேட்டையா?
என்று...

குருவி மாதிரி
குட்டிக் கவிதைகள்
பருந்து மாதிரி
பெரிய கவிதைகள்
என்றேதும் கிடையாது

வானத்தில் வாழும்
நிமிடங்கள் எல்லாமே
கவிதைகள் தான்

சிலந்தி வலைக்கும்
பறவை கூட்டிற்கும்
இடம் தரும்
குடிசை வீடுகள்
கவிதை தான்

கிறுக்கு
கொஞ்சம் இருந்தாலே
கவிதை தான்

செருப்பு
அறுந்து போகாதவரிடம்
செருக்கு
அறுந்து போகாதிருக்கும்

சந்தேகம் என்றால்
சொல்லிப் பார்
உன் செருப்பறுந்த சங்கதியை

விருந்துண்ட
அவன் காதுகள்
மெல்லச் சிவக்கும்

உன் கண்களுக்குத் தெரியாமல்
அது
அப்படித்தான் சிரிக்கும்

எதுவும் முளைப்பதற்கு
காலம் அவசியம்

காத்திருந்தால்
சம்பவங்கள் மீது
சொற்கள் முளைக்கும்

காத்திருந்தால்
சொற்கள் மீது
கவிதை முளைக்கும்

காத்திருந்தால்
மின்னல் முளைக்கும்
சொற்கள் முளைக்கும்
கவிதை முளைக்கும்

காத்திருந்தால்
காதல் முளைக்கும்
தாடி முளைக்கும்
கவிதை முளைக்கும்

காத்திருந்தால்
கனவு முளைக்கும்
இரவு விழிக்கும்
கவிதை முளைக்கும்

விளையாட
நேரம் பார்த்து
காத்திருந்தது

விடுமுறைக்கு
தேதி கிழித்து
காத்திருந்தது

வாடகைக்கு
சைக்கிள் எடுக்க
காத்திருந்தது

நெல்லிக்காய்கள்
காய்க்கும் வரை
காத்திருந்தது

ஒலியும் ஒளியும்
பார்க்க பக்கத்து வீட்டில்
காத்திருந்தது

நிலவைப் பாம்பு
முழுங்கக் காணக்
காத்திருந்தது

தீபாவளிக்கு
பட்டாசு வாங்கி
காத்திருந்தது

புத்தாடை வாங்க
டெய்லர் கடையில்
காத்திருந்தது

கறிக்குழம்பு
ஆகும் வரை
காத்திருந்தது

ரஜினி படம்
முதல் நாள் பார்க்க
காத்திருந்தது

கல்லூரிக்கு
பள்ளி நாட்களில்
காத்திருந்தது

நண்பனுக்கு
கடைத் தெருவில்
காத்திருந்தது

காதலிக்கு
எந்த நேரமும்
காத்திருந்தது

முதல் சம்பளத்தை
வாங்கி எண்ணக்
காத்திருந்தது

முழுச் சம்பளத்தை
அம்மா கையில் கொடுத்து
காத்திருந்தது

காத்திருந்தது எல்லாமே
கனவு ஆனது
கவிதை ஆனது

கல்யாணம்
ஆகும் வரை
காத்திருந்தது

பிறகு
காத்திருக்க முடியாமல்
மாறிப் போனது

குறித்த நேரத்தில்
குறித்த எல்லாமும்
நடக்கச் சொன்னது

குறி தவறிடாது
இருப்பதற்கு
இலஞ்சம் புகுந்தது

கூவம் நதி
நாறும் படி
விதி மாறியது

குப்பை மேடுகள்
வசதிக்கேற்ப
இடம் மாறியது

காத்திருக்காத
ஒரு கூட்டத்திற்காக
உலகம் மாறியது

சிறகுகள் இல்லாத
வானம் செல்லாத
பறவையானது கவிதை

கவிதை மாறியது
கலவரம் ஆகியது பூமி
வேடிக்கை பார்க்கிறது சாமி

கண்ணுக்கு தெரியாமலிருந்து
வாழ வைத்தது
அன்று சாமி

கண்ணுக்கு தெரியாமலிருந்து
வாழ்வை அழிக்கிறது
இன்று கிருமி

சாமியும் கவிதை
கிருமியும் கவிதை
நாளையும் கவிதை

கிறுக்கு
கொஞ்சம் இருந்தாலே
கவிதைதான்...

பலம் தான்
அத்தனை சுரண்டல்களிலும்
உன்னை நிலை நிறுத்தும்

கடற்கரைப் பலகையில்
அலைகள் அழித்து அழித்து
ஒரே பாடம் எடுக்கிறது

பாடம் படித்த பாதங்கள்
கூடவே  வருகிறது...

உடல்
கழிவகற்றும்
நன்றி சொல்வேன்

மனம்
கழிவகற்றும்
நன்றி சொல்வேன்

மரணம்
எனை அகற்றும்
நன்றி சொல்வேன்

பசி
வயிற்றிலிருந்து
வளர்ந்து வளர்ந்து
மாயப் பெரும் விருட்சம் ஆனது
வளர்ந்து வளர்ந்து
உலகே பசியாக மாறி
பசித்தோரை எல்லாம்
தின்று தின்று
நில்லாமல் சுழல்கிறது...

தன்னோடு
தானே குதிப்பது
தன்னோடு
தானே சிரிப்பது
தன்னோடு
தானே அழுவது
தன்னோடு
தானே சண்டையிடுவது
தன்னோடு
தானே தள்ளி நிற்பது
தன்னோடு
தானே துணையாய் நிற்பது
தன்னோடு
தானே பேசுவது
தன்னோடு
தானே எல்லாமும்

தன்னோடுதான் பிறப்பு
தன்னோடுதான் இறப்பு
தனியில்லை எப்போதும்
தன்னோடுதான்...

மெத்த பொம்மைகள்
வைத்து விளையாடும் பிள்ளைகள்
ஒத்த பொம்மையும் இல்லாமல்
தனித்து விளையாடும் பிள்ளைகள்
பொம்மையிலும் இன்மையிலும்
விளையாட்டு கூடி விளையாடும்
விளையாட்டு உருவமில்லாதது
விளையாட்டு காலமில்லாதது

கடவுள் விளையாட்டா?
காலம் விளையாட்டா?
கண் பார்க்க முடியாது
கடைசிவரை தெரியாது
விளையாட்டு ஒளிந்து விளையாடும்
இதுவரையில் கண்டதில்லை

மறைந்தே விளையாடும்
விளையாட்டை கைப்பிடிக்க முடியாது
விளையாட்டு கை பிடித்தால்
விளையாடலாம்...

எந்த விளையாட்டும் விளையாட்டு
கோல்ஃப் பந்து கோலி குண்டு
பேதம் இல்லை எல்லாம் ஒன்று

சோப்பு நீர்க் குமிழிகள் ஊதி
ஓ...என்றுக் கத்திப் பாடி
உன்னோடும் விளையாடும்
ஊராருடனும் விளையாடும்
காற்றோடும் விளையாடும்
கரைந்தும் விளையாடும்
விளையாட்டு விளையாடும்

கவி பாடும்
நடனம் ஆடும்
யார்யாருடனோ பேச வைக்கும்
யாரும் இல்லாதும் பேச வைக்கும்
மலையில் ஏற்றும்
குழியில் தள்ளும்
அன்பு செய்யும்
அடித்தும் கொல்லும்
விளையாட்டு விளையாடும்

அன்னையாய் காதலியாய்
தெய்வமாய் அழகிய பேயாய்
நண்பனாய் பகைவனாய்
ஞானியாய் பித்தனாய்
ஒளியாய் இருளாய்
அருளாய் சாபமாய்
எதிலும் நுழைந்தாடும்
விளையாட்டு விளையாடும்

வீழும் இறகோடு
உதிரும் சருகோடு
சரியும் மண்ணோடு
புரளும் கல்லோடு
எரியும் விறகோடு
மிதக்கும் படகோடு
பறக்கும் கூந்தலோடு
விளையாட்டு விளையாடும்
மறைந்தே விளையாடும்
விளையாட்டை கைப்பிடிக்க முடியாது
விளையாட்டு கை பிடித்தால்
விளையாடலாம்...