ரகசியம் பேசும் குழந்தைகளை
ரகசியமாக நின்று கவனிக்கும் போது
நானும் குழந்தை ஆவதும் ரகசியம்...

வெற்றியை இதயத்தில் வை
தோல்வியை தலையில் வை
இரண்டிற்கும் அப்பாற்பட்டது வாழ்க்கை
நினைவில் வை...

காலமும் நேரமும்
வானில் வட்டமிட்டுக் காத்திருக்கும் பருந்துகள்
இரையாகும் தருணம் எப்போதும் உண்டு...

இடது கையிற்கு
வலது கை ஆறுதல் சொல்லும் போது
தனிமை எழுந்து சென்றது...

தனிமையை தனிமையில்
விட்டுவிட விருப்பம் இல்லை
விடாமல் பார்த்துக் கொண்டிருந்தேன்...

அது திரும்பி வந்தது
வலது கையை முத்தமிட்டுத்
தழுவிக் கொண்டது...

இடது கை இப்போது
தனிமையையும் சேர்த்து
வலது கையை அணைத்துக் கொண்டது...

நான் நானாக இருப்பதும்
நீ நீயாக இருப்பதும்தான்
பேரின்பம்...

தேவையில்லாதவன்
தேவை இல்லாதவன்
ஞானி...

தந்தையை மறுக்காதவன்
தந்தை தவிர வேறில்லை
ஒன்று போல ஒரு மரமும் இல்லை...

தனித்து நிற்கும் போது
கடலலை மெதுவாகத் தொடுகிறது
இதயம் உந்தன் கரங்களை உணர்கிறது...

பெயர் இல்லாத போது
நான் பிரபஞ்சம்...

மண்ணில் விழுந்தாலும்
சுவைக்கக் கற்றுத் தந்தது
நாவல் பழம்

ஒரு பிரச்சனையும் இல்லை
என்பதும் கூட
ஒரு பிரச்சனை தான்...

ஒருவர் என்று நினைக்கும்
ஒவ்வொருவரிலும் உண்டு
இன்னொருவர்...

வாழ்க்கையைப் படிக்காமல் இருப்பதற்கு
பள்ளிக்கூடங்கள் பாடம் எடுக்கின்றன
தனியார் பள்ளிகள் தரமாக
அரசுப் பள்ளிகள் தாமதமாக...

ஒவ்வொருவர் கதையிலும்
நானும் ஒரு கதாபாத்திரம்
என்னுடைய கதையிலும்
ஒவ்வொருவரும் கதாபாத்திரம்...

இறந்தால் பிறக்கும் எதிர்காலம்
இல்லையென்றால் வெறும் இறந்தகாலம்
கனவு அதுவே நிகழ்காலம்
கற்பனைக்கு மட்டுமே முக்காலமும்

நீர் இல்லாது தாகமும்
நீ இல்லாது மோகமும்
கொஞ்சம் கொஞ்சமாய் கொல்லும்...

புறத்திற்கும்
மறு புறத்திற்கும் இடையில்
அகம் என்னும் கதவு நான்...

உள்ளே வெளியே விளையாட்டு
பெரும் சூதாட்டம்
வெறும் போராட்டம்...

கடல் தொட்டியில்
நனைந்து விளையாடும்
திமிங்கிலமும் குழந்தை...

நீர் தொடு
கவலை விடு
ஆனந்தம் இந்த உலக வீடு...

சொல்லிச் செல்வதில்லை
மேகம்
தூர நின்று அழும்...

விருந்தாகும் முன்
வீணாகும் முன்
விரும்பி வாழ்வோம்... 

சாத்தான் சாகசக்காரன்
ஒரு வினாடி போதும்
அவன் வென்று விட...

கடவுளுக்கு தான்
வாழ்க்கை முழுவதும் வேண்டும்
அப்போதும் அவன் தோற்றே போகிறான்... 

காப்பர் கலரில்
புது இலைகள்
கிளையின் நினைவுகள்...

வானவில் போல
இலைவில்
வாழ்வில்
எத்தனை வண்ணங்கள்...

தெருவில்
பல உருவில்
எண்ணிலா நிறங்கள்...

நிஜமும் பொய்
நிழலும் பொய்
தாங்கி நிற்பதே மெய்...

கோபத்தில்
உணவைத் தூக்கி எறிந்தாலென்ன
கத்தியைக் குத்திச் செருகினாலென்ன...

எல்லாம் ஒரு நொடி
அதை ஏற்று
எப்போதும் சிரி...

வெறும் கை
வெறும் வயிறு
வெறும் வார்த்தைகளில் சொல்லிட முடியாதது...